شهر رمضان هل علينا , كل عام وكل ام طيبة , مساء الهنا ازيكم, خمس حاجات سريعا تمسكي بهم في رمضان طالما انت لسة ام جديدة او حتى ام قديمة بس عندك اعباء جديدة اوي مع الاطفال, هنتكلم فيهم كده مع بعض بكل سهولة بس عوزاكي تركزي معايا .
5 طرق إتبعيها لتنظيم يومك في شهر رمضان
1- رمضان شهر الخير
اول حاجة يا جماعة رمضان شهر الخير شهر البركة شهر العبادة مش شهر الاصناف. يعني اهم حاجة لازم تحصل في رمضان مش اننا نعمل سمبوسة وكنافة وكل يوم ستاشر حاجة على السفرة.
اهم حاجة لازم تحصل في رمضان اننا ناكل ونشرب وناخد السوايل بتاعتنا بشكل صحي واننا نصلي بقى ونصوم ونتقرب لربنا.ففكرة ان احنا بنقعد الام في المطبخ. اربع ساعات قاعدة جوة بتعمل ستمية صنف. عشان هو ده رمضان وعشان هو ده صيام لأ مش الصيام. على رأيك بتقول لك رمضان ما عمروش قال كده. اعملي يا حبيبتي اصناف تساعدكم في الصيام.
والله ده ممكن حتة واحدة زبادي على السحور. تقويك على الصيام. طبق فول يقويك على الصيام. اكتر من مكرونة بالبشاميل اللي واقفة تعملي فيها قد كده والمحشي بورق العنب اللي عمالة تلفيه
والتفريزات اللي عمالة تفردي فيها آآ بقى لك شهر لغاية ما ضهرك وجعك ورجلك وجعتك ونسيتي تاخدي ادويتك ونسيتي تاخدي فيتاميناتك وطبعا مضغوطة جدا فعصبية جدا مع الولاد ورمضان كله قلة نوم. يلا اعمل الفطار يلا ادخل المطبخ يلا اعمل السحور.
لو دخلت المطبخ الساعة خمسة هتخرجي المغرب. لو دخلت المطبخ الساعة تلاتة هتخرجي برضو المغرب. هو احنا كده في رمضان. فلو سمحتم يا جماعة عشان خاطري افتكروا ان القعدة الحلوة.
والمصحف في ايدك. ان شاء الله يا رب هتصلي ركعتين قيام. لو ظروفك سمحت. القعدة حلوة مع ولادك وانت هادية. ابرك في البيوت من الاصناف والسفرة الكبيرة والتباهي بقى الصور السوشيال ميديا.بصوا يا جماعة انا عملت كم صنف في العزومة دي.
والناس تتقابل مع بعض في العزومات المفروض عشان وحشين بعض. عشان عايزين يقعدوا مع بعض. مش عشان يتنططوا على بعض. كل واحدة جابت مفرش عامل ازاي. وعلقت زينة رمضان عاملة ازاي.وعملت روتين لتنضيف البيت فين رمضان يا جماعة؟ انا مش شايفة اي رمضان في اللي انتم بتقولوه.
2- السحور مهم
نمرة اتنين السحور مهم لك. انا بشوف امهات من ساعة ما بتصحى لغاية ما بتنام بتلف على البيت تعمل له كل حاجة في الدنيا لدرجة انها والله قبل ما الفجر يبدأ ما بتلحق تحط السندوتش في بقها.
طب هو انت فاكرة ان البيت ده كله اهم منك
طب هو انت فاكرة ان ده من الحب
طب ما هو زي ما انت بتحبيهم المفروض هم يحبوك. توزيع المهام في رمضان مهم جدا. ان انت تحطي نفسك اولا دي نمرة تلاتة على فكرة. ان انت تحطي نفسك اولا في بعض الاشياء دي مش انانية.
3- راعي نفسك أولا
انت تحافظي على ان انت كيان محتاج يصوم عنده صحة لازم يحافظ عليها. عنده صحة نفسية محتاج يحافظ عليها دي فضيلة. انا لو علمت اولادي ان هم عندهم مسؤوليات ولازم يساعدوني. وان ماما دي كائن حي. هيطلعوا بني ادمين مسؤولين. بيعرفوا يحسوا باللي حواليهم ويساعدوه.
لو علمتهم ان انا بلم كل حاجة من وراهم. وبجيب الشراب انا من الارض اروح احطه في الغسيل. هيفضلوا كده حتى بعدين. هيفشلوا في كل حاجة بعدين في حياتهم.
ليه? لان هو ان الناس بتشيله في كل حاجة. الناس بتلم وراه في كل حاجة. لأ الست دي محترمة. قاعدة بتخدمكم من اول النهار لاخره. حقها في الاخر لما تمسك كوباية الشاي ولا تمسك المصحف وتقعد بالهداوة كده تسيبوها في حالها. تدوها وقتها. نحترم وقتها.
4- نظمي وقتك
نمرة اربعة نظمي وقتك. اكتبي كده. انا عندي اهداف ايه؟ واكتبي اهداف منطقية الله يكرمك. يعني مش واحدة مثلا لسه والدة ما بقالهاش شهر. عايزة كل يوم تعمل صنف ما اعرفش اعمل ايه. وعايزة تختم القرآن كل خمس ايام.
يعني بس بالهداوة علينا. اوكي؟ حطي حاجات منطقية واحب حاجة لربنا الحاجة الدايمة. حتى لو حاجة قليلة انا عايزة احقق كذا في افطار كل يوم. انا عايزة احقق كذا في عباداتي.
انا عايزة احقق حاجة مع الولاد. ما هو الولاد دول برضو من ضمن عباداتي. وحاجة مهمة جدا. وحاجة برضو بتقربني من ربنا. فبالتالي انا مثلا هفرز الحاجة الفلانية لانها هتساعدني في رمضان.
اساسيات. انا مش عايزة نضيع وقت كتير قوي في تفريز حاجات ما لهاش لازمة. يعني الحياة مش لازم تمشي بتلاتة كيلو سمبوسك. احنا ممكن ندوق السمبوسك في رمضان. مش لازم كل يوم مش عارفة ايه سمبوسة ولا سمبوسك عشان هندخل في الخناقة الكونية دي.
انما لو سبت الامور بالبركة كده هتلاقي نفسك يوم في يوم في يوم انت مجهدة جدا. ما بتاكليش كويس. مش لاحقة تقفي على رجلك. ما ليلة القدر جت. وانت اصلا لسة ما لحقتيش تعملي اي حاجة من اللي كنت عايزة تقريه في القرآن.
مسلسل خطف مسلسل الحياة اتاخدت عزومة عند فلان. والعزومة بكرة عند فلان. والعيال ما حققوش حاجة وانت ما حققتيش اللي انت نفسك فيه. ففكري انت عايزة ايه. مش مهم والناس شايفة حاجة ولا حاجة وحشة.
المهم انت عاوزة ايه? وايه خطتك عشان تنفذيه? ايه اولوياتك اللي هترتبيها؟ واخر حاجة نمرة خمسة يا جماعة رمضان شهر الرحمة. صح؟
5- رمضان شهر الرحمة
رمضان الشهر اللي بيبقى فيه كرم وبنحاول ناخد بالنا فيه من الناس. اليومين دول الناس تعبانة. فلو سمحتم اللي مش قادر حتى يطلع صدقة. مع ان الصدقة دي هتحط لك بركة في بيتك وهتحمي ولادك وهتعمل حاجات كتير. اللي مش قادر يحط صدقة يضحك على الاقل في وش البني ادمين.
لان الناس محتاجاها. اقول لك حاجة؟ انت كمان تستاهلي الرحمة. مش الرحمة دي للبشر بس. انت كمان يا حبيبتي ارحمي نفسك.
ارحمي نفسك من تقطيم كل ليلة. ارحمي نفسك من الاحساس بالتقصير والذنب. سامحيها. مش رمضان ده الشهر اللي بنسامح فيه كل البشر. طب ليه سهل نسامح كل البشر وصعب نسامح نفسنا.
ما تسامحي نفسك لو فيه حاجة خرجت كده عنك ما كنش حلوة. سامحيها واقفي على رجلك وقولي انا هبطلها وتاني يوم هبقى كويسة. انا عملت الف حاجة صح. قدام الحاجة الصغيرة اللي انا عملتها. في كل الاحوال انت بتحبي الولاد دي.
حتى لو بتحطي نفسك في الاخر. ده مش معناه انك مهملة في شخصك. ده معناه ان انت ست حنونة وطيبة وبتحبي الناس. ما نقدرش نعتبرها حاجة غلط فيك. بس برضو افتكريها.
وعلمي الناس يفتكروها. السلسلة دي كلها لسلامك النفسي اسمها طبطبة. كل اربع ساعة عشرة على اليوتيوب. كل خميس ساعة عشرة على فيسبوك. لو الفيديو ده طبطب عليك.
او غير فكرتك عن رمضان. لو سمحت طبطبي بيها على حد تاني.
وكل سنة وكل أم طيبة .