طفلى هايصوم رمضان, احنا بنكلم الاطفال عن رمضان من اول ما يبقوا عمرهم تلات سنين مثلا بيقدروا يستوعبونا ويفهموا يعني ايه رمضان واحدة واحدة وفانوس وصيام والكلام ده.
إزاي أعلم طفلي الصيام في رمضان !!
بنبتدي نعلمهم صيام جزئي من خمس لسبع سنين على حسب بنية الطفل الجسمانية طفل مليان وواخد باله من نفسه كويس ولا طفل تعبان قوي.
وكل واحد على قد سنه هقول لك ازاي. بنبتدي نقول للطفل صوم صيام كامل تقريبا من تسعة لاتناشر سنة.
ما هو السن المناسب لطفلي ليبدأ في الصيام !!
كل طفل بيختلف عن التاني يعني اغلبهم على العشر سنين من عشرة لاتناشر سنة بيبقى قادر ان هو ان شاء الله يصوم اليوم على بعضه وطبعا كل طفل غير التاني.
ما هي عدد ساعات الصيام المناسبة لطفلي !!
عدد ساعات الصيام لازم مبدأيا يبقى تدريجي. يعني ما ينفعش من اول يوم رمضان اقول له مثلا صوم ست ساعات على بعض. لا انا بدرجهم. ومش بزودهم كل يوم ساعة.
لأ انا بزودهم كل اربع خمس تيام ساعة او ساعتين.
على حسب عمر الطفل. طب ابدأ بكام ساعة؟ والله لو طفل صغير مثلا ست سنين حاجة في العمر ده ممكن تبدأي من ساعتين. وهنبتدي كل تلات اربع تيام على حسب تقبل الطفل نزودهم تدريجيا.
بس خدي بالك اجمالي عدد ساعات الصيام. الطفل هيصومها على اخر رمضان لما يبقى ان شاء الله بقى بيزود عدد الساعات ما ينفعش يتعدى عدد سنين عمره.
يعني انا عندي ولد صغير عنده ست سنين. مش هينفع يصوم اكتر من ست ساعات متواصل. عندي طفل مثلا عنده سبع سنين.
مش هينفع يصوم اكتر من سبعة متواصل. طبعا دا بعد تسع سنين والكلام دا بيتحسن كتير. فبيقدروا يصوموا ساعات اطول.
بس في الاول لا معلش هندرب بنبتدي من ساعتين. وهنطلع للسقف بتاع عدد ساعات عمر الطفل.
وانا في السن الصغير بحب اللي هو ايه؟ الصيام العكسي. زمان واحنا صغيرين كانوا بيقولوا لنا مثلا صوموا من الصبح للضهر. بعد شوية صوموا من الصبح للعصر.
لما كبرنا لقينا انه علميا وصحيا افضل للطفل انه يصوم بالعكس.
يعني مثلا انت النهاردة هتصوم من العصر للمغرب. وهتفطر معنا في المغرب. فنبنختار وقت ما يبقاش حر اوي فالطفل ما يفقدش سوايل كتير.
نمرة اتنين بيبقى انا ضامنة ان هو اكل طول اليوم فمش هيدوخ مني لو صام من العصر للمغرب.
النمرة تلاتة وده المهم جدا انه بيفطر معنا على المغرب.
فبيحس انه كبير زينا فبيبقى متحمس قوي انه يفطر زي ما الكبار بتفطر. فسيبيه ياكل بالنهار وابتدي تدريج الساعات من المغرب وانت طالعة.
مثلا النهاردة هتصوم من العصر للمغرب. المرة الجاية هنرفعها شوية نخليها من الضهر للمغرب. لغاية ما تكبر وتبقى بتصوم من السحور لغاية الفطار.
ما هي الحالات التي أمنع فيها الطفل عن الصيام !!
ربنا يبارك فيهم. عشان اخلي الطفل يبتدي يصوم معي. لازم يكون وزنه وطوله كويسين. ما عندوش انيميا. او سوء تغذية ما عندوش مشاكل في الجهاز الهضمي بالذات لو عنده امساك لان الامساك هيزيد.
ما عندوش جفاف او اي علامات للجفاف ما عندوش اي امراض مزمنة. الطفل اللي بيصوم يوم كامل لازم يتسحر يا جماعة. مش اختيار. ولازم يتسحر متأخر. ما تطاوعيهوش في ان هو عايز ينام بدري.
قوميه ان شا الله ياكل سندوتش. عشان ما يروحش المدرسة دايخ. علمي الطفل ان فيه علامات زي بنقول عليهم اللي هو مثلا زي اشارة حمرا. لو قابلتها انت لازم تطلب المساعدة وتفطر. زي ايه؟
زي ان الطفل يدوخ جدا جدا. يكون عرقان حتى وهو قاعد مش بيعمل اي مجهود. تحسي ان عنده كسل شديد جدا مش قادر يقوم ولا يلعب ونشاطه متأثر جدا. امساك شديد جدا لدرجة ان هو بيصرخ وهو داخل الحمام مش قادر. البول لونه غامق.
خدوا بالكم يا جماعة لازم نتابع لون البول ده. اهم حاجة علامة جفاف. البول لو لونه اصفر فاتح يبقى انت ماشية صح وابنك بياخد سوايل صح. وقادر على الصيام. البول لو لونه غامق او رايح ناحية البني او داكن.
او له ريحة قوية. لا دي علامة ان الطفل مش قادر. هو لازم على الاقل يوقف يومين تلاتة. ويبتدي تاني بكميات اصغر. حاجة كمان مهمة جدا.
في علامات لنقص الاملاح لازم تتابعيها في الطفل. زي مثلا ان انت لما تيجي تغيري الهدوم وتغسليها. تلاقي في الحتة بتاعة تحت الابط ملح. حاجة عاملة زي ذرات الملح كده. ده معناه ان الطفل بيفقد املاح كتيرة.
انه لما بيعرق او بيدمع لها طعم. الدموع نفسها لو جت على بقه بالصدفة او حاجة تحسي ان لها طعم. ده معناه ان الاملاح عنده مش متظبطة. انه لو طلع في الشمس وهو عرقان تلاقي الحتت دي محروقة.
يعني لونها احمر جدا جدا جدا.
وحصل فيها التهاب. ده التهاب بسبب الاملاح اللي طلعت. وطبعا لون البول زي ما اتفقنا اهم حاجة. طالما هصوم يبقى لازم اظبط نفسي مع مواعيد تمارين.
في السن الصغير اللي هو مثلا تحت تمن تسع سنين ما ينفعش يبقى صايم وبينزل يعمل تمرين في عز الحر.
لما هيكبروا هيعملوا دورات رمضانية وهيعملوا كل حاجة وهيجروا وكله تمام. انما الصغيرين قوي اللي بينزلوا تمرين قوي جدا. معلش اعكسي ساعات الصيام بتاعتهم بحيث وقت التمرين يبقى بياخد كمية السوايل الكافية له. بعد الفطار
إيه هي نوع السوايل اللي إديها لطفلي !!
بقى مهم جدا من الفطار للسحور. اعطى المية تدريجي.
للطفل لو طفلك يعني بيصوم عدد ساعات كبير او ليوم كامل. فلازم ادرج الماية من الفطار للسحور. كل ساعة يشرب. ما فيش حاجة اسمها هحوش الماية للاخر. قل لي العصاير والسكريات.
على حساب ان انت تزودي الماية. لان السكريات هتسحب الماية اللي في جسمه.
انما المية او الشربة او اللبن هتفضل في جسمه فترة طويلة. ممكن تدي الطفل تمر. هيدي له التمريتين مثلا.
او تلاتة. اه هيدي له الطاقة هيدي له حديد هيلين معه شوية من الامساك. فبيبقى لطيف جدا ومفيد جدا على فكرة.
اه على فكرة حتى الام اللي بترضع تاخد هيزود لها ادرار اللبن. زودي الخضار في الاكل عشان خاطر الطفل يدخل الحمام يبقى فيه الياف بياخدها.
دخلي زبادي دخلي خيار وحاجات غنية بالمية عشان يوصل له سوايل كتير على قد ما تقدري المقليات خاصة السمبوسة. خليها بالعقل يعني انا مش بقول نمنعها. بس بالعقل مش هينفع نقعد على طبق كبير كله بانيه وحاجات مقلية ومحمرة.
والطفل ده هيصوم تاني يوم. فمحتاج طبعا نشويات معقدة وحاجات تساعده.
نشويات معقدة دي زي ايه؟ زي بليلة على السحور.
الاطفال اللي بتحب الشوفان دول نادرين جدا ممكن تعمليها مافن ، الرز. العيش البلدي، الفريك للاطفال اللي بتحب الفريك. ربنا يقويكم.
نتمنى مشاركة الموضوع ليصل لأكبر عدد من الأمهات والكل يستفاد , كل سنة وانتم بالف صحة وهنا.