الكاكاو هو مصدر رئيسي للشوكولاتة، وهو عبارة عن مسحوق مصنوع من حبوب الكاكاو التي تأتي من شجرة الكاكاو.
يعتبر الكاكاو غنيًا بالمواد المغذية والفيتامينات والمعادن، ويعزز الصحة العامة بطرق عديدة، بما في ذلك تحسين صحة القلب وخفض ضغط الدم وتحسين صحة المخ والجهاز العصبي.
كما أنه يحتوي على مضادات الأكسدة التي تساعد في الحفاظ على صحة الجلد وتقليل خطر الإصابة بالعديد من الأمراض المزمنة مثل السرطان وأمراض القلب والسكري.
يتم استخدام الكاكاو في صناعة الشوكولاتة والمشروبات الساخنة مثل الكابوتشينو والكوكا والحلوى والأطعمة الأخرى لإضفاء نكهة غنية ومميزة.
فوائد الكاكاو للصحة: كيف يمكن لتناول الكاكاو أن يحسن الصحة العامة .
فوائد واضرار مشروب الكاكاو. اول من زرعوه كانوا شعوب المايا. واول من نقلوه وعرفونا عليه كانوا الاسبان. وكان زمان بيسموه باسم مشروب النبلاء.
يعني انت وانت بتشربه دلوقتي تعتبر من النبلاء. اكتر دولة منتجة له هي دولة ساحل العاج. ويليها دولة غانا.
ومش بس ساحل العاج وغانا. ففي اكتر من 50 دولة في العالم منتجة للكاكاو وفي اكتر من ستة مليون مزارع بيزرع شجرة الكاكاو.
مبدئيا كده ثلاث ملاعق من الكاكاو الخام الغير محلى بالسكر هيمدونا ب 36 سعر حراري. و3 جرام بروتين واقل من 2 جرام دهون.
وفيه حوالي 9 جرام كربوهيدرات لكن 6 جرام منهم عبارة عن الياف. وبما ان المثل بيقول ladies first يعني السيدات أولا.
فعايزين نذكرهم ان الكاكاو الشركات بتستخدمه في تصنيع كريمات البشرة. اللي بتستخدم للترطيب وللحماية من علامات التمدد الجلدي
اللي بتحصل اثناء الحمل او بعد التخسيس. كمان الكاكاو بيصنعوا منه اقلام زبدة الكاكاو. اللي بتستخدم لترطيب الشفة وحمايتها من الجفاف.
الكاكاو يقلل من خطر الإصابة بالأمراض المزمنة؟
اما لو عايز تملى جسمك بمضادات الاكسدة عشان تحمي نفسك من مرض السرطان. يبقى اشرب كوباية كاكاو يوميا وانت في شغلك او وانت بتذاكر.
زي ما احنا عارفين كثرة الجزور الحرة او الشوارد الحرة في جسمنا شيء غير صحي.
لذلك دايما بينصحونا ان احنا ناخد مضادات اكسدة. مضادات الاكسدة دي بقى موجودة بوفرة في الكاكاو.
لانه غني بمواد البولي فينول واخص بالذكر مادة الكاتيكين ومادة الايبيكاتيكين.
ففي دراسة اتعملت عام 2020 وجدوا فيها ان الكاكاو مفيد في سرطان الثدي. ودراسة اخرى كانت في عام 2016 وجدوا فيها انه مفيد في سرطان المبايض.
طبعا انا مش بقول ان الكاكاو هيعالج السرطان. ولكن مما لا شك فيه انه شراب مفيد وغني بمضادات الاكسدة. احد مشاكلنا ان نوعية الاكل بتاعنا وضغوط الحياة بتؤدي الى زيادة الالتهابات في الجسم.
ووجدوا ان تواجد الالتهابات مع الجزور الحرة في الجسم بيؤدي الى خطر الاصابة بالامراض المزمنة.
زي الضغط والسكر والكوليسترول وخلافه. لكن الحمد لله ربنا اوجد لنا اطعمة واشربة بتحتوي على مواد مضادة للالتهابات ومضادة للاكسدة. والمواد دي موجودة بوفرة في شراب الكاكاو. كمان الكاكاو مفيد لصحة الجهاز الهضمي.
لان المواد اللي فيه بتعتبر مواد غذائية للبكتيريا النافعة اللي موجودة في جسمنا.
فالبكتيريا النافعة بتتغذى على المواد دي. وبالتالي هتساعدها في القضاء على البكتيريا الضارة.
وكلنا نعلم اهمية البكتيريا النافعة لصحة الجهاز الهضمي. لذلك الشركات بقت بتعبيها في ازايز نشربها عشان نحافظ على صحة الجهاز الهضمي عامة.
والحماية من الاسهال خاصة. لو عايز تحافظ على صحة القلب وتقلل من ضغط الدم المرتفع اشرب كاكاو.
مش عشان بس بيحتوي على المواد المضادة للالتهابات والمضادة للاكسدة اللي هتحمينا من الامراض المزمنة.
ولكن عشان بيحتوي على مادة اكسيد النيتريك اللي بيوسع الاوعية الدموية وبيقلل ضغط الدم المرتفع وبالتالي بيقلل من خطر الاصابة بالامراض القلبية. لأ استنى رايح فين؟ ده مش قاصر فقط على مضادات الاكسدة والنيتروك اوكسيد.
ده الكاكاو كمان بيتميز انه غني بالبوتاسيوم والمغنيسيوم والنحاس. اللي بيساعدوا ايضا على توسيع الاوعية الدموية. وتقليل ضغط الدم المرتفع. اما بقى مريض السكر فالكاكاو الخام الاصلي بيكون خالي من السكر.
وبيبقى غني بالالياف اللي قلنا عليها مرارا وتكرارا انها هتأخر وتقلل من امتصاص السكر اللي موجود في اكلنا.
كيف اكتشف الإنسان الكاكاو وكيف تطورت زراعته .
ده غير كمان ان المواد اللي موجودة في الكاكاو تساعد على اخراج الانسولين. وبالتالي هتساعد على ظبط مستوى السكر في الدم. عايز بس أكد على معلومة ان الكاكاو فعلا من الحاجات الغنية جدا بالالياف.
فثلاث ملاعق من الكاكاو هيمدونا بربع احتياجنا اليومي من الالياف. ولكن عشان تكون المعلومة كاملة في نقطة جوهرية مهمة جدا خاصة بمرضى السكر. هذكرها لما اجي اذكر اضراره. مش عايزين ننسى ان الكاكاو هو السبب في سعادتنا.
لان من الكاكاو قدرنا نصنع الشيكولاته والشيكولاتة الصحية دايما بنقول عليها انها تكون غنية بالكاكاو. بحيث نسبة الكاكاو اللي فيها ما تقلش عن 50% . ويا حبذا لو كانت النسبة 70% فيما فوق.
وسبب السعادة دي ان الكاكاو بيحتوي على مادة التريبتوفان اللي بتتحول في الجسم الى هرمون السعادة اللي هو هرمون السيرتونين.
كمان الكاكاو غني بمادة مهمة جدا وهي مادة الثيوبرومين. اللي لها دور مهم جدا في النشاط والحيوية.
ده غير ان الكاكاو بيحتوي على كمية معقولة من الكافيين. فالخلطة دي بقى اللي في الكاكاو كفيلة انها تصحصحك وتحسن من مودك لذلك لو عندك شغل او مذاكرة محتاجة تفكير اشرب قبلها كوباية كاكاو.
عايز اقول برضو ان في بعض الابحاث ولكنها بصراحة ابحاث ضعيفة بتربط ما بين مادة الابيكاتيكنز اللي في الكاكاو ودورها في الحماية من الزهايمر.
وعلى الرغم ان الكاكاو فيه كافيين ومادة الثيوبيرومينن. لكن ما ننساش ايضا انه غني بالمغنيسيوم والتريبتوفان.
اللي هيحسنه من جودة النوم عندك في حالة انك بتعاني من ضغوط عصبية ونفسية. لذلك انصحك انك تشرب الكاكاو ولكن بلاش قبل النوم مباشرة.
اشربه مثلا كده على العصرية , الكاكاو الخام مشروب صحي لو بتعمل حمية غذائية. وهيساعدك على تقليل الوزن. بس بشرط طبعا انك تكون بتشربه بدون سكر. طيب يعني ايه دوره يعني في الحمية الغذائية او انقاص الوزن؟
وظيفة الكاكاو في أنقاص الوزن .
هقول لك دوره بمنتهى البساطة بيتلخص في انه بيعطيك بالامتلاء وبيساعد على سد الشهية.
ده غير كمان ان له دور بسيط في زيادة معدل الحرق في الجسم بتاعك. لذلك انا شايف ان مشروب الكاكاو مشروب صحي جدا. ولكن بشرط ان احنا نتجنب اضراره. هو الكاكاو له اضرار؟.
هاقول لك بصراحة ان الكاكاو الخام ما لوش اي اضرار. ولكن الكاكاو الخام طعمه مر جدا. لذلك الشركات هتعمل ايه عشان تحسن من طعمه؟
اكيد انت عرفت. العدو الاول واللدود. الشركات هتضيفه للكاكاو اللي طبعا السكر عشان تحسن من طعمه. فيجي مريض السكر يشربه.
وما يضيفش له اي سكر ولكن يلاقي سكره بيرتفع. وفي نفس الوقت بيلاقي وزنه بيزيد. فحاول على قد ما تقدر تجيب الكاكاو الخام من شركة محترمة. وتقرا ورقة البيانات اللي عليه. وتتأكد انه خالي تماما من السكر.
بس انا جبت الكاكاو الخام ده. وبصراحة طعمه مر جدا ومش مستحمل الطعم بتاعه. هقول لك حل بسيط.
لو انت مش مستحمل طعمه خالص ممكن تضيف عليه المحليات البديلة للسكر وعلى سبيل المثال سكر استيفيا. سكر استيفيا ده انا دايما بحب استخدمه.
بالمناسبة دي مش دعاية له اطلاقا. فانا ما ليش علاقة باي فرد من الشركة بتاعته.
لكن عن تجربة شخصية انا باحط سكر استيفيا في الشاي والقهوة وبيحلي طعمهم بالظبط زي السكر الابيض.
ولكن بدون اضرار السكر الابيض. فسكر استيفيا خالي من السعرات الحرارية. وكمان مش بيرفع السكر الا بمقدار بسيط جدا. كمان من المميزات في ان بيستحمل درجات الحرارة العالية.
والميزة دي مش موجودة في كتير من المحليات البديلة للصبح. خلينا نرجع بقى لمرجوعنا وهو الكاكاو. وخليني اذكركم انه بيحتوي على مادة الثيوبرومين. والمادة دي زي ما لها فوائد.
فهي لها اضرار ايضا. ولكن الحمد لله. الاضرار دي مش بتظهر غير عند اخذ جرعات عالية من الكاكاو.
أضرار الكاكاو على الإنسان .
طيب ايه الاضرار دي؟ الاضرار دي ان ممكن المادة دي تزيد من ضربات القلب.
وممكن تسبب شوية صداع. ولكن لو تشرب الكاكاو بمعدل كوباية او كوبايتين او حتى تلات كوبايات في اليوم.
فان شاء الله مش تحصل الاضرار دي. كمان فيه معلومة مهمة جدا لحضرتك او حضرتك لو بتعانوا من الصداع النصفي. فالكاكاو والشيكولاتة ممكن يكونوا حافز لزيادة هجمات الصداع النصفي.
لذلك لو حضرتك تعاني من صداع نصفي انصحك انك تقلل من تناول الكاكاو والشيكولاتة ايضا.
الكاكاو مش يتشرب بس بالماية. لا ده انت ممكن تعمله هوت شوكليت. تضيف له لبن او حليب ولكن ساعتها خد بالك من السعرات الحرارية. الكاكاو كمان ممكن تضيفه على عصاير السموزي.
وممكن ترش بودرة الكاكاو على الموز او الفراولة او الفاكهة عامة. ده غير كمان ان الشركات بتصنع من الكاكاو الشوكولاتة الغامقة والبودينج كمان. اللي هو بيبقى طعمه زي المهلبية.
لكن لو عايز تدفي نفسك عشان برد الشتا دلوقتي. فانصحك انك تشرب مشروب الكاكاو.
وهو ساخن.